Ɛ́ɛ́ kaan fɔ tɔ ko ɛ́ɛ́ sɛmɛi fɔ kumagooma kpɛrɛ un, tɔ wo rɛ. Nka ɛ́ɛ́ kaan fɔ tɔ ko ɛ́ɛ́ sɛmɛi fɔ a yɛrʼlɔ raha kumagooma rɔ un, tɔ vosi nan ni. Goo rehe yɛ cehe baara ɲɛ̀ re kè, tɛɛ duun nɔ ŋaan yɛ kaan nɔ ko sɛmɛi rɔ foo taa duungooma rɔ un. Ɛ́ɛ́ dɔn tɔ sa shɛ, mùn yʼà kpaun, i duundín nɔ sa yɛ iun kaan dihikun duungooma rɔ rè kaa.
Mùn dɛɛi yɛ dinra, i kumagooma rɔ rè yɛ lantaragoo rɛi jehera sheraha rɔ teenmenra. Tɔun no, goo o goo yɛ fɔra savabu tɛɛ kumagooma rɔ le jahan, tɔ nafan nɔ nan lera ɛ̀ɛ̀ lantanragoo rɛi un dan.
Mùn yɛ ni min nehe ra ijei kè, sɛmɛ reheì yɛ ni duungooma rɔ shɛ, tɛi yʼà too taara duungooma rɛɛ kaan Mali kaangba rɛi sa ra, zhɔnma seun fara gbanma shɛ, ari diɲa yɛrʼlɔ xuima rɔ doun.
Tɔun sa ro, mùn yɛ ki nun vosi siti tohoo taa sanshɛ ziriun, nehe cɔhɔ rɛɛ i <duunve> tɛɛ na à taa, mùn nan shɔkɔ rɔ sɔhɔn ba duungooma rɔ kaan nɔ ko à sɛmɛ rɔ un voma?
Nun siti nun naran yɛ fɔi wove ni duungooma rɔ lafinkɔɔn rɛi maa jeì ja miin duungooma rɔ shɛ, neheì yʼà too taara, ì yɛ i yɛrɛkaan, tɛɛ na à taa kaanfa nan tɛn ì ra?
1. Guide d’orthographe (neheì yɛ sɛmɛi rɔ ko kaan nɔ foo taara tubabugooma rɔ un.)
2. Duungooma rɔ ABCdɛrʼlɔ.
3. Silabɛrʼlɔ. (Neheì nan kaan fɔ ɲɛhɛ.)
Téléchargements:
